Hvar fæ ég afrit af uppdráttum?

Aðaluppdrættir eru aðgengilegir á teikningavef kortasjá www.map.is/sudurland Séruppdrætti má nálgast í hjá embætti byggingarfulltrúa

 

 

Hvar get ég fundið upplýsingar um það hvort íbúðin sem ég er að íhuga að kaupa er „samþykkt“?

Embætti byggingarfulltrúa veitir upplýsingar um það hvort íbúðir eru „samþykktar“.  Hafðu samband í síma 4805550 eða netfangið utu@utu.is

 

 

Frá hverjum þarf ég leyfi til að setja skjólvegg á lóðarmörk?

Sækja þarf um byggingarleyfi hjá embætti byggingarfulltrúa fyrir skjólveggjum og  girðingum lóða sem ekki falla undir undanþáguákvæði byggingarreglugerðar.

Til undantekningar teljast:

  • Skjólveggir og girðingar sem eru allt að 1,8 m að hæð og eru ekki nær lóðarmörkum en 1,8 m.
  • Girðingar eða skjólveggir sem eru nær lóðarmörkum en 1,8 m og eru ekki hærri en sem nemur fjarlægðinni að lóðarmörkum.
  • Allt að 2,0 m langir og 2,5 m háir  skjólveggir sem eru áfastir við hús og í a.m.k. 1,8 m fjarlægð frá lóðarmörkum.

Lóðarhöfum samliggjandi lóða er heimilt án byggingarleyfis að reisa girðingu eða skjólvegg allt að 1,8 m að hæð á lóðarmörkum, enda leggi þeir fram hjá leyfisveitanda undirritað samkomulag þeirra um framkvæmdina. Hámarkshæð girðingar/skjólveggjar miðast við jarðvegshæð við girðingu/vegg eða jarðvegshæð lóðar á lóðarmörkum ef hæð jarðvegs þar er
meiri en jarðvegshæð á lóð við vegginn.

 

Hvernig eru byggingarstjóri og iðnmeistarar skráðir á verk?

Eigandi þeirrar eignar þar sem byggingarframkvæmdir standa til skráir byggingarstjóra verksins hjá embætti byggingarfulltrúa. Þegar embætti byggingarfulltrúa hefur samþykkt byggingarstjórann, þá ber hann í framhaldi ábyrgð á að leggja fyrir byggingarfulltrúa lista yfir þá iðnmeistara sem hann hyggst ráða til verksins. Byggingarstjóri fær eyðublað fyrir skráningu iðnmeistara inná heimasíðu embættisins www.utu.is/eydublod/ .

Ef byggingarstjóri hættir á meðan á framkvæmdum stendur ber eigandi ábyrgð á því að nýr byggingarstjóri taki við störfum án tafar og á að tilkynna breytinguna til embættis byggingarfulltrúa.  Hætti iðnmeistari umsjón með framkvæmdum áður en verki er lokið sér byggingarstjóri um að nýr iðnmeistari taki til starfa án tafar og að tilkynna breytinguna til embættis byggingarfulltrúa.